育嬰室

未有小芍蕎之前，我都甚少去育嬰室，通常都係某些大型百貨公司或者商場才會有育嬰室。當然，香港國際機場咁大規模，就梗係有喇！

小芍蕎正在等候換尿片，佢好似有D緊張，可能有D怕陌生啩！
到咗上BB床，小芍蕎都係木無表情！

跟着我就快速地換片，
小芍蕎當然不忘望鏡頭，所以最後沒有同Nikki姐姐影大合照囉 (有D遺憾)！

原來係育嬰室內仲有其他細房，裏面仲有梳化可以比爸爸坐吓！不過，我就覺得育嬰室的冷氣較凍，所以要多着衣服保暖！

小芍蕎學彈琴

當小芍蕎漸漸長大，我們需要用不同的物件去引導她的潛在能力。當她滿月時，我的堂妹 (即是小芍蕎的姨姨)，送了一個玩具電子琴給她，直至最近，我們拿出來給她玩。呢個琴可以自動播歌、又或者按鍵盤而發出不同聲響！

你睇佢真係好似係度彈緊琴咁樣，
我自己本身並不知道點樣彈琴，又覺得自己無藝術修養；雖然細嗰時學過拉小提琴，但已經完全唔記得晒！希望將來都可以培養些藝術空間給她發揮！
唔知佢第時大個，會唔會係女版李雲迪呢？

歡送Nikki姐姐

自從Nikki要去澳洲讀書後，教會不同的小組都有同佢搞歡送會，包括兒童崇拜的大食會、以諾人的黃金酒店下午茶Buffet，到了最後，Nikki要上機，我們一家大小都有來送行！

今次Nikki去澳洲係讀有關兒童的課程 (詳程唔係太記得)，不過點都好，Nikki對教導小朋友真是好有耐性。以諾團的下一代，快D同Nikki姐姐影相，笑一笑呀！等出年Nikki學成歸來，再有新生命可以見到妳！

大合照時間，點解唔見左我地一家？因為小芍蕎要換尿片，去左育嬰室！

悶悶不樂

因乜事小芍蕎會木口木面呢？等我zoom遠小小睇真D。

原來是她用身體打斜在床仔上，佢既頭仔已經頂住床角，無得再郁喇！所以咪咁唔開心囉！

除了頂住頭仔外，同場仲加映"露底"！千祈唔好心邪，原來是露紙尿片，你話佢幾咁粗佬呀！我的小芍蕎，你是女仔，唔該妳斯文D呀！

"捐"來"捐"去

當小芍蕎越來越大時，她好喜歡轉來轉去，所以婆婆專登買咗張地席比佢係地下玩，唔駛驚佢"錄"落地。於是我哋係天水圍屋企都買了地席給小芍蕎用。我會發覺佢自己可以轉成四個圈咁多！

仲有樣好笑嘅事，可能我哋屋企梳化較高，佢就可以整個人仔的下半身係梳化底，上半身就係外邊，跟住佢就大叫，等我哋救番佢出嚟！

睇吓佢，陰陰笑咁樣，好似同我哋講:"爸爸、媽媽，我又係梳化底喇"

我與奧運冠軍的合照

近排奧運熱潮，席捲全城，話說前幾日，我係電腦搵相時，忽然有所發現。大家睇一睇同我一齊影相係咩人? 佢咪係奧運金牌選手 - 熊倪。應該係2005年秋天左右，我有一次去南京出差，早上係酒店食早餐時，我見到一個很面善既人，跟著我就問我D同事，佢係咪以前係我地公司邊個部門做架? 而我D同事話比我知，佢係跳水王子，熊倪。

跟住我就膽粗粗行過去，問可唔可以同佢影相，佢當然話無問題，仲十分之友善添！ 跟住翻查有關佢既資料，"1982年進省隊。1986年參加全國跳水冠軍賽，一舉奪得四項冠軍，隨即被選入 國家隊。14歲，在漢城奧運會上一舉成名，雖然獲得的是一枚銀牌，可卻贏得了 “無冕之王”的美譽。 1992年，他帶著一份“不破樓蘭誓不還”的雄心壯志，來 到巴塞羅那奧運會的賽場上。命運似乎在和這位天才開玩笑，他僅僅獲得跳臺第 三名，不得不再次臥薪嘗膽。在1996年亞特蘭大奧運會上，熊倪終於拿到了一枚來之不易的金牌。為中國贏 得了第一枚男子跳板金牌，圓了他8年前的奧運冠軍夢。在參加了97年全運會後， 宣佈退役。2000年9月26日，第27屆雪梨奧運會男子跳板決賽，重新復出的熊倪力克強大的對手薩烏丁 ，決賽進程跌宕起伏，驚險萬分，前五輪熊倪一直稍微落後於薩烏丁。最後一跳 ，薩烏丁小有失誤！熊倪不負重望，跳出81.60分的高分。勇奪冠軍。"

好快就北京奧運開幕，大家記得支持中國隊！中國、加油！中國、加油！

註: 原來跳水冠軍都唔係好高!

網上作品展

星期六及星期日通常都無乜時間去寫Blog，因為小芍蕎在我自己屋企時，好多嘢都要有自己做，所以通常會係平日寫多D，update一吓大家！以下就是多得秀雲姨姨介紹的網站，只要把相upload，就可以選擇不同背景，真係超簡單，整個過程唔駛三分鐘。

似唔似去咗展覧館睇藝術品? 講真吖，小芍蕎咪就係我哋嘅超級精緻藝術品囉！

小芍蕎的笑聲

相信每個父母除了看着自己的兒女慢慢成長，都很希望聽見他們的笑聲，我哋都唔例外。

當小芍蕎一日一日的長大時，她就會對外界有不同的反應，而我哋就希望可以捕捉到佢的反應，影底作為記念，以下就係一個好例子。

話說有一晚，爸爸抱着小芍蕎玩的時候，佢用Ｄ大約幾毫米長嘅鬚，不停咁拮係小芍蕎臉上，然後她就發出"、、"的笑聲，真係聽到我心都甜哂！

唔信你睇吓以下照片作証，嗰樣雖然有D唔自然，但係她真係好開心！

小芍蕎坐起來!

不知不覺地小芍蕎已經七個多月了，由初初的每天只顧在床上睡覺，然後慢慢咁不停地把玩弄她的小手小腳，到現在她自己可以坐起來了。


不過佢D坐姿就好似猩猩仔一樣，要用拳頭仔撐著才可以坐直起來。
起初聽身邊的人說，話BB是”三仆六坐”，即是話BB三個月大的時候可以仆轉身，六個月就可以坐起來，真係無錯喎。 雖然小芍蕎可以坐起來，但係有時都需要大人扶才可以。唔該晒爸爸係後面支持！

唔知道幾時，她就可以學行路呢? 我相信大約一歲左右吧！到時再update大家啦！

PS : 有無留意小芍蕎好多時都會望住鏡頭呢？佢好似對鏡頭好敏感，一知道要影相，佢就會即刻定落黎，唔通將來有機會做大明星？

我的小時候

現在大個仔大個女，有時真係唔知道以前自己細嗰時的情況，不過好在科技發達、日新月異，所以，可以保存很多資料給各方好友分享。

前幾日，我係電腦內揾到呢張相，着住紅色褸仔咪就係我囉，隔離嗰咪就係我細佬。呢張相就係影樓內拍攝，我當然大約三、四歲左右。其實自己真係一D印象都無，但係就非常鐘意呢張相

因為細佬細嗰，所以坐在馬仔單車上，而我則企係旁邊，用一隻手扶着單車一邊，好一幅姐弟情深的照片。若果將來我哋屋企再添新成員的話，小芍蕎就會變成家姐，希望她都會愛惜自己的兄弟姊妹。

新生命之誕生

現在做了媽媽，很想知道究竟以前出生時候係點樣？但唔知點解自己的媽媽總是輕輕帶過，到底是她唔記得定抑或唔想講，不過算吧，我就會寫下來，讓小芍蕎知道。

小芍蕎原本的預產期是11月30日，但是她毫無動靜，於是我的主診醫生在12月1日放了催生丸給我，去迎接這個小新生命。 因為諗住就嚟要生BB，所以嗰晚專登去酒店鋸扒，等自己有氣力生小孩子。大約到了凌晨十二點幾，羊水穿了，Tony就立即打電話call車，二點幾到達醫院，送到待產室，一路陣痛到大約四五點左右，個胃好辛苦，將所有吃過的東西全部嘔出來。早上七點左右，我的主診醫生來看我的情況，並吩咐姑娘同我吊鹽水，到大約十點就被推入產房，我以為好快生得，(中途一直吸入一些氣體，可以減輕陣帶來的痛楚)，但是一直陣痛到下午大約二點四十五分，我的主診醫生終於到達，大概十五分鐘後，小芍蕎終於平安出世了。

這是我真正和小芍蕎的第一張合照，
當時小芍蕎的身體是軟軟的，好似公仔一樣，眼睛都未完全睜開，
最後梗係要有一張全家福合照，(唔該晒姑娘) ！
媽媽懷胎十月生妳出來，真的是不簡單呀；希望小芍蕎長大成人後，要多多錫晒爸爸媽媽！整個生產過程雖然很辛苦，但是有老公及神的支持才是最重要！

我愛洗白白

相信每個媽媽都經歷過幫自己的小孩子做好多事情，例如開奶、換尿片、掃風、沖涼等。在眾多事情上，我自己覺得最困難的是幫BB沖涼！

先前我只是去上過一些育兒講座，而係講座裏面的沖涼環節，只是用Video播了大約十多分鐘的片段。心諗到時候點算，不過真是功多藝熟，我現在都可以說係熟手技工了。

首先幫小芍蒿蕎洗頭，睇下佢幾enjoy！

跟著緊係沖涼啦，佢好鐘意係水度踢水，又搶著拿小毛巾；有時叫佢沖完涼要起身，佢反而同我跣番落過盆度，都真係幾攪笑！

遠近照片

這張相是攝於小芍蕎大約三個月時的時候，她的眼睛、鼻子、耳朵、小咀都是很細緻的。

看見她微微笑時，真是十分滿足，相信每個媽媽都有相同的感受吧！

小芍蕎與熊仔

當自己無聊的時候，很喜歡把小芍蕎放在不同的物件上做吓比較，以下是一個例子。

首先用相機把小芍蕎快拍下來，然後變成以下作品，(特別鳴謝秀雲姨姨介紹我用做這photo editor)。

然後我將自己睡覺的熊仔和小芍蕎放在一起，就變成"美女與野獸"，你睇吓佢哋都幾friend！

香車配美人?!

Tony爸爸愛車的程度都幾係佢的排行榜頭幾位。他會定期幫車身洗白白、勤力打呔氣、清潔地壇等，可以話係佢嘅大老婆！

除了大老婆以外，他當然還有他的賢內助，呢個咪係我囉！

以下就是香車配大小美人照，有近影及遠影；










當然唔少得Tony爸爸、小芍蕎和他心愛的大老婆合照啦！

三人家庭照

從舊年開始，我們家裏就起了不小變化，因為我們很快就會添了一個新的小生命。有時無聊時，都會做一些無聊事情。 好似以下幾張相，我是等小芍蕎睡覺時偷偷地去影，好想表達一種親切感。

比一比邊個拳頭大？大手當然是媽媽，而小手就是小芍蕎，



















好似ET外星人接觸，



















Tony爸爸見到後，當然唔放過機會，佢話都要一齊影喎，真係無佢符；就係咁，一張"三人家庭照"就誕生喇！

第一對鞋仔

小芍蕎的第一對鞋仔是婆婆買給她。話說前幾天打八號風球，婆婆就去商塲睇吓有無BB嘢買，然後就買了這對鞋給她。當然這對鞋不是講她學走路，只不過是裝飾一下。這是一對小紅鞋，有蝴蝶结及魔術貼的波鞋款式，













究竟這對鞋有幾大？就是跟我的手提電話差不多大小，













相信等小芍蕎長大後，她自己可以看看她的成長歷程。

天生女人購物狂

是不是所有女性都是天生購物狂?我相信答案是，因為我都是其中一份子。

當小芍蕎未出世的時侯，我巳經常常買東西給她。當她出世後，這個習慣更加沒有改變。上個星期日，我們一家人去奧海城飲茶，飲完茶後，在商塲內逛街，睇睇有無什麼特別。

忽然間，我見到一間童裝舖寫着"Removal Sales, Up to 80%"，便走進去看看。當然有所收獲，以下就是我的戰利品，原價要二百幾，特價是三十元一條。

背心格仔裙，













長袖連身裙，













最後當然滿心歡喜的回家去。